अपर तामाकोसीको साधारण सभा रोक्न विगू गाउँपालिकाको माग

ताजा समाचारको लागि फलो गर्नुहोस ।

दीक्षण समाचार
चरिकोट, १० असार
अप्पर तामाकोसी हाइड्रो पावर लिमिटेडको वार्षिक साधारणसभा तत्काल स्थगित गर्न दोलखा बिगु गाउँपालिका प्रमुख (अध्यक्ष) युधिष्ठिर खड्काले चेतावनी दिएका छन् । सोमबार कम्पनीलाई पत्र लेखी उनले यस्तो चेतावनी दिएका हुन् ।
जिल्लाबासी सेयरधनीलाई पर्याप्त जानकारी नदिई साधारणसभा गर्न लागेको भन्दै चेतावनी दिइएको हो । बुधबार (असार ११ गते) कम्पनीको साधारणसभा हुन लागेको छ । साधारणसभाबाट सर्वसाधारण तर्फबाट ४ सञ्चालक चयन गर्ने तयारी छ । सर्वसाधारणको प्रतिनिधिको रूपमा सञ्चालक नियुक्त गर्ने सभामा जिल्लाबासी वा सबै सेयरधनीलाई जानकारी नगराएको भन्दै उनले आपत्ति जनाएका छन् ।
साधारणसभा हुनु ३ दिनअघिमात्र बिगु गाउँपालिकालाई मौखिक जानकारी आएकाले सरोकारवालासँग परामर्श गरेर अर्को मिति तोक्न पनि अध्यक्ष खड्काले आग्रह आग्रह गरेका छन् । आयोजना निर्माणक्रममा उत्पन्न समस्या समाधान गर्न जिल्ला तथा गाउँपालिकाले पुर्याएको योगदानलाई ध्यान नदिएको भन्दै उनले कम्पनीको ध्यानाकर्षण गराएका छन् । साधारणसभा मिति नसारे आयोजना निर्माण रोक्ने उनको घुमाउरो चेतावनी छ ।
उनले कम्पनीलाई लेखेको पत्रमा भनिएको छ– घोषित मितिका सबै कार्यक्रम तत्काल स्थागित गरी दोलखाका गाउँपालिका, नगरपालिका, संघ–संस्था र सरोकारवालासँग छलफल गरी अर्को मिति तोकी सबै सेयर सदस्यको मतदान गर्न पाउने अधिकार सुनिश्चित गरी राष्ट्रिय गौरवको आयोजना निर्माण अविछिन्न रूपमा अगाडि बढाउने वातावरण सिर्जना गरिदिनुहुन अनुरोध गर्दछु । खड्काले जिल्ला समन्वय समितिको कार्यालय चरिरकोटलाई बोधार्थ लेखेर कम्पनीलाई पत्र लेखेका छन् ।
सञ्चालक बन्न १२ जनाको आवेदन परेको छ । बुधबार हुने साधारणसभा र चुनावबाट ४ जना छनोट गर्ने योजना छ । कम्पनीले ४ सय ५६ मेगावाटको माथिल्लो तामाकोसी जलविद्युत आयोजना निर्माण गरिरहेको छ । अहिलेसम्म आयोजनाको करिब ९८ प्रतिशत निर्माण पूरा भएको छ । ४ सय ५६ मेगावाटको माथिल्लो तामाकोसी जलविद्युत आयोजना निर्माण गरिरहेको अप्पर तामाकोसी हाइड्रो पावर लिमिटेडमा सर्वसाधारणका तर्फबाट सञ्चालक बन्न १२ जना प्रतिस्पर्धामा छन् । ४ जना सञ्चालकका लागि १२ जनाको उम्मेद्वारको रुपमा आवेदन दिएका छन् ।
सर्वसाधारण सेयरधनी समूह (ख) बाट सञ्चालक बन्न मनोनयन दर्ता हुने समयसम्म उक्त आवेदन परेको हो । सञ्चालकका लागि ३ महिलासहित १३ जनाले नाम दर्ता गराए पनि एक जनाबारे उजुरी परेकाले १२ जनाको मात्र सूची प्रकाशन गरिएको सहायक निर्वाचन अधिकृत संजिव लामाले जानकारी दिए ।
असार ११ गते हुने वार्षिक साधारणसभाबाट ४ जना सञ्चालक छनोट हुनेछन् । कम्पनीमा ८ लाख १८ हजार सेयरधनी छन् । सेयरधनी सबैले सञ्चालक छनोट गर्न मतदान गर्न पाउनेछन् । देशैभरि सञ्चालक रहेकाले अधिकांशले प्रोक्सी राखेर मतदान गर्ने बताइएको छ । शनिबारसम्म सबैले प्रोक्सि बुझाएका छन् ।
कम्पनीको सञ्चालक बन्नका लागि प्रकाश भुषाल, डा. प्रदिपकुमार मैनाली, अशोक बुढाथोकी, हरिप्रसाद भुर्तेल, गोसाइँ केसी, कल्याणी रिमाल, सिर्जना सुवेदी, प्रकाश तिवारी, विश्वनाथ शर्मा, लोकेन्द्रबहादुर साउद, सुशिल पोखरेल र रामहरि शर्मा रहेका छन् । मैनाली, केसी, रिमाल र पोखरेल दोलखाबासी हुन् । त्यसैगरी विश्वनाथ शर्मा र साउद नेपाल विद्युत प्राधिकरणका कर्मचारी हुन् । प्रोक्सि गणनापछि जसको बढी हुन्छ उसले विजयी हाँसिल गर्छ । तर प्राक्सि दिन छुटेका शेयरधनीले साधारण सभाकै दिन उपस्थित भएर पनि मतदान गर्न सक्ने व्यवस्था रहेको कम्पनी सचिव श्रेष्ठले बताए ।

Shares

Dikshan Online TV

Be the first to comment on "अपर तामाकोसीको साधारण सभा रोक्न विगू गाउँपालिकाको माग"

Leave a comment

Your email address will not be published.


*