अप्पर तामाकोसी सेयर संकलनको मितिमा पुर्नविचार हुने

ताजा समाचारको लागि फलो गर्नुहोस ।

दोलखा, १८ असार
माथिल्लो तामाकोसीको आयोजना प्रभावितका लागि दोस्रो पटक अप्पर तामाकोसी हाइड्रोपावर कम्पनीले सेयर निष्काशन आव्हान गरेको मिति पुर्नविचार गर्न स्थानीय जनप्रतिनिधिहरुले माग गरेका छन् । दोलखा जिल्ला समन्वय समिति चरिकोटमा सोमबार दोलखाका ९ वटै स्थानीय तहका प्रमुख र उपप्रमुख सहितको बैठकले सेयर संकलनको मिति केही दिन पर सार्न माग गरेका हुन् ।
जनप्रतिनिधिहरुको बैठकले स्थानीय (दोलखाबासी)का लागि आउँदो साउन १६ गतेदेखि भदौ १४ गतेसम्म संकलन गर्न माग गरेको हो । यस अघि जारी आव्हान पत्रमा असार २४ गतेदेखि साउन ९ गतेसम्म सेयर संकलनको लागि सूचना जारी भएको छ ।
बैतेश्वर गाउँपालिकाका उपाध्यक्ष रविचन्द्र आचार्यले असार मसान्तमा सबै आर्थिक वर्षको हिसाव मिलान, साउनको पहिलो हप्ता पनि लगानी सुरु नभएकाले मिति केही पर सार्नका लागि अनुरोध गरेको बताए । वर्षाको बेला पनि भएको र किसानहरु पनि असारे खेतीमा व्यष्त हुनु पर्ने हुनाले मिति हेरफेर गर्न आग्रह गरेको उनले बताए ।
त्यसैगरी सेयर लगानीमा बढी सहभागीता जनाउनका लागि काठमाडौंमा पनि संकलन केन्द्रको व्यवस्था गर्न परिवारको एकै व्यक्तिको खाताबाट सबैको सेयर हाल्ने व्यवस्था गर्न समेत माग गरेका छन् । धितो पत्र ऐन २०७३ मा धितो पत्र खरिद बिक्रीलाई सरल र व्यवस्थित गर्न सिआश्वा प्रणाली लागू भए तापनि स्थानीय जनप्रतिनिधि, दलका नेताहरुकै दबाबमा लाइन बसेर लगानी गर्नु पर्ने पुरानो प्रणालीको माग गरेका हनु् । यसबाट लगानीकर्ताले पछि किनबेच गर्ने बेलामा दुःख पाउने शेयर विश्लेसकहरुको भनाई छ ।
अप्पर तामाकोसी हाइड्रोपावर कम्पनीका प्रमुख कार्यकारी अधिकृत विज्ञानप्रसाद श्रेष्ठले जनप्रतिनिधिका मागलाई आफूले सकारात्मक रुपमा लिएको प्रतिक्रिया दिए । “जनप्रतिनिधिहरुको माग सकारात्मक नै छन्”, उनले भने “धितो पत्र बोर्डको स्वीकृत पाएको २ महिना भित्र सेयर संकलन सुरु गर्नु पर्ने कानुनी बाध्यता छ, त्यो भित्र भए छलफल गर्न सकिन्छ ।” धितो पत्र बोर्डले जेठ २३ गते स्वीकृत पाएको हो । धितोपत्र बोर्डबाट स्वीकृत पाए सेयर निष्काशनकर्ता नागरिक लगानी कोष र सनराइज क्यापिटलले सेयर आव्हान गरेका हुन् ।

मिति सार्नुभन्दा समय थप्नु बेस
आयोजनाको स्थानीयका लागि जारी गरेको सेयर संकलनको मिति सार्नुभन्दा समय थप गर्नु बेस हुने सेयर विश्लेसकहरुले सुझाव दिएका छन् । पटक पटक जारी हुँदै स्थगित हुँदै आएको तामाकोसीको सेयर लगानीको लागि पुनः मिति सार्दा अन्यौल हुने हुँदा जुन मितिमा सुरु भएको छ त्यसैलाई समय थप गरेर साउनभर वा भदौ १४ सम्मै पु¥याउन सकिने अवस्था छ । नागरिक लगानी कोषका एक सेयर विश्लेशकले जनताहरु सेयर खुल्यो भनेर एक किसिमको मानसिक रुपमा तयारी भएकाले सयम थप गर्नु नै बेस हुने उनले बताए ।
चिलिमे जलविद्युत आयोजनाका लागि पनि रसुवाबासीका लागि ३७ दिन सेयर संकलनका लागि समय लागेको थियो । अप्पर तामाकोसी हाइड्रोपावर कम्पनीका प्रमुख कार्यकारी अधिकृ विज्ञानप्रसाद श्रेष्ठले कम्पनी, धितोपत्र बोर्ड लगायत सरोकारवालासँग छलफल गरेर उचित निर्णय गरिने बताए ।
सेयर वितरण प्रक्रिया कानुन अनुसार भएको बताए । धितोपत्र ऐन २०७३ अनुसार सेयर आवेदन संकलनका लागि ३५ दिनसम्म म्याद राख्न पाउने हुनाले दोलखाबासीका लागि पनि अप्पर तामाकोसीको सेयरमा आवेदन दिन ३५ दिनसम्म म्याद राख्न सकिने बताए ।
अहिले आव्हान भएको सेयरमा असार २४ गतेदेनि साउन ९ गतेसम्म १८ दिन छ । एउटै सुचनामा ३५ दिन नै राख्दा आवेदन अन्तिमममा मात्र परेर प्रयाप्त रकम संकलन नहुने आशंकाले थोरै दिन राखेको बताए । सकेसम्म धेरै दोलखाली अप्पर तामाकोसीको सेयरमा सहभागी गराउन म्याद थप हुन सक्ने बताए ।
प्रदेश सभा सदस्य पशुपति चौलागाई र विशाख खड्काले पनि समय पुर्नविचार गर्न प्रदेश सभामा समेत कुरा उठाएका छन् । स्थानीय नागरिक समाजका प्रतिनिधिले समेत पुनःविचार गर्न माग गरेर ज्ञापन पत्र बुझाइसकेको छ ।
यस अघि जनप्रतिनिधिहरुले नै तामाकोसी आयोजना पक्षलाई सेयर निष्काशन नरोक्न निर्देशन दिंदै आएका थिए । स्थानीयको सेयर संकलन नगरी सर्वसाधारणको १५ प्रतिशत सेयर संकलन गर्न पाइन्न । सर्वसाधारण १५ प्रतिशत र जिल्लाबासीको १० प्रतिशत गरी २५ प्रतिशत सेयर संकलन गर्नु पर्छ । त्यसवापत २ अरब ६४ करोड हुन्छ ।
सेयर संकलन ढिला हुँदा आयोजनालाई मासिक २ करोड ६४ लाख व्याज भुक्तानी गर्नु पर्छ । आयोजनाको हालसम्म ४० अरब खर्च भइसकेको छ । स्थानीय र सर्वसाधारणको सेयर संकलन नभए आयोजनाका लागि भुक्तानी मै समस्या हुने देखिन्छ ।
आयोजनाले २०६९ मै सेयर निष्कासन तयारी थालेको थियो । तर जिल्लास्तरीय समन्वय समितिमा बसेका राजनैतिक दलका नेताहरुले नै संस्थापक सेयर लिने कि साधारण सेयर भन्ने बुझ्नै २ वर्ष लाग्यो । अन्ततः साधारण सेयर नै भन्ने बुझाइ भयो र त्यसैमा सहमति भयो । त्यसपछि २०७१ मा सेयर निष्काशन प्रक्रिया सुरु भएको हो ।

Shares

Dikshan Online TV

Be the first to comment on "अप्पर तामाकोसी सेयर संकलनको मितिमा पुर्नविचार हुने"

Leave a comment

Your email address will not be published.


*