हरिकृतन समितिका सदस्यहरु अब एउटै पोशाकमा (नौ फोटो फिचर सहित )

ध्रुव आचार्य
सिंगटी, ८ साउन
मान्छेहरुले आफ्नो पुरानो धर्म र रहन सहन त्याग्दै गएका बेला सिंगटीमा भने त्यसको संरक्षणमा स्थानीयहरु जुटेका छन् । धर्म संस्कृति जोगाउन र आफ्नो पहिचान बचाउन हरिकृतन सेवा समिति नै बनाएर नियमित भजन पाठमा लागेका छन् ।
समितिकै आव्हानमा हरेक एकादशीको दिन सामुहिक रुपमा भेला भएर धार्मिक पूजापाठ र भजन कृतन हुने हरिकृतन सेवा समिति सिंगटीकी अध्यक्ष रमा खड्काले जानकारी दिइन् । सिंगटीको बजारका खोलावारी पारी सबै भेला भएर यस्तो काम सुरु गरेको हो । नियमित भजन स्थानीय शिव मन्दिर र स्थानीयको घरमा समेत हुने गरेको उनले जानकारी दिइन् । पछिल्लो भवन कहाँ हुने भन्ने सोही कार्यक्रममै सहमति हुन्छ र आयोजना हुन्छ ।
हरिकृतन सेवा समितिमा आबद्ध हुनेको संख्या हरेक कार्यक्रममा बढ्दै गएको छ । विगू गाउँपालिका वडा नं. ४ सिंगटीमा रहेको शिव मन्दिरमा समितिकै आयोजनामा सप्ताह समेत भयो । त्यसको सोमबार अषाढ शुक्ल एकादशीकै अवसर पारेर समापन भयो । सप्ताहकै अवसरमा हरिकृतन सेवा समितिमा आबद्ध सबैका लागि पोशाकको समेत व्यवस्था गरेको छ ।
आफ्नो पहिचानका लागि पोशाक व्यवस्था गरेको अध्यक्ष खड्काले जानकारी दिइन् । पोशाक महिलाहरुका लागि चौबन्दी चोली र धोती साथै पुरुषहरुका लागि कुर्तासुरुवाल तोकिएको छ । सप्ताहकै अवसरमा सबैलाई पोशाक विगू गाउँपालिकाका अध्यक्ष युधिष्ठिर खड्काले व्यवस्था गरिदिए । पोशाक वापतको खर्च र सप्ताहका लागि ४ लाख खर्च गरेको बताए ।
“धर्मले व्यक्ति र समाजलाई अनुशासित बनाउँछ” अध्यक्ष खड्काले भने “सिंगटी क्षेत्रमा पछिल्ला समयमा विकृतिहरु र अनुशासनहिन गतिविधि हुन थालेकाले धार्मिक कार्यक्रममा समेत सहयोग गर्न थाालेको हुँ ।” सिंगटीमा रहेको शिव मन्दिरको बाँकी काम निर्माण पूरा गर्न र नियमित पूजा पाठका लागि नियमित पण्डित बस्ने व्यवस्था पनि आफूले गर्ने बताए । पण्डितका लागि लाग्ने खर्च व्यक्तिगत रुपमा आफैं सहयोग गर्ने समेत उद्घोष गरे ।
मन्दिरको नियमित आम्दानीका लागि सिंगटी बजारमा रहेको मन्दिरको जग्गामा सटर निकाले र घर बनाएर भाडामा लगाउने व्यवस्था गर्ने बताए । मन्दिरको थप निर्माणका लागि गाउँपालिकाको तर्फबाट समेत चालु आर्थिक वर्षमा बजेट व्यवस्थापन गरेको जानकारी दिए । साथै सिंगटी बजार व्यवस्थापनका लागि २० लाख र घाट पुर्ननिर्माणका लागि समेत प्रयाप्त बजेट व्यवस्थापन गरेको उनले जानकारी दिए । सिंगटी ३ गाउँपालिकाको केन्द्र भएकाले यसलाई व्यवस्थित र सुरक्षित बजार बनाउने बताए ।

फोटो फिचर हरिकृतन सेवा समाजको आयोजनामा भएको सप्ताह समापन