“५ वर्षपछि हामी अरु सरकारलाई ऋण दिने हैसियतमा हुन्छौं”

????????????????????????????????????

ताजा समाचारको लागि फलो गर्नुहोस ।

युधिष्ठिर खड्का
अध्यक्ष, विगू गाउँपालिका

विगू गाउँपालिकाले आगामी आर्थिक वर्षका लागि ३५ करोड ७१ लाख ८० हजारको बजेट असार १० गते गाउँ सभामा प्रस्तुत गरेर त्यसको १० दिन भित्रै पास ग¥यो । चिनियाँ सिमासँग जोडिएको गाउँपालिकाले सडक, शिक्षा, स्वास्थ्यलाई जोड दिएको छ । माथिल्लो तामाकोसी सहित ठूला जलविद्युत आयोजनाहरुको निर्माणस्थल रहेको विगू प्राकृति स्रोत साधनका हिसावले देशकै अब्बल स्थानीय तह मानिन्छ । निर्माण व्यवसायीको रुपमा परिचित लादुकबासी युधिष्टिर खड्काले गाउँपालिका अध्यक्ष निर्वाचित भएपछि ध्यान केन्द्रित पनि सडक लगायतका पूर्वाधार विकासमै जोड दिएका छन् । प्रस्तुत छ, दीक्षण दैनिकका लागि अध्यक्ष खड्कासँग सम्पादक श्रृजन घिमिरेले विगू गाउँपालिकाको विकास योजनाका सन्दर्भमा गरिएको अन्र्तवार्ता ः

तपाई गाउँपालिका अध्यक्ष भएको एक वर्ष भयो, एक वर्षे कार्यकाल कस्तो रह्यो ?
हामी निर्वाचित भएर आएको एक वर्ष पुग्यो । गत वर्ष निर्वाचित हुने वित्तिकै नीति तथा कार्यक्रम र बजेट हतार हतारमै बनाउँनु प¥यो । निर्वाचन अघि जुन उत्साहले हामी आएका थियौं, तर अहिले त्यस्तो त छैन । स्थानीय तहको सरकार छुट्टै भने तापनि केन्द्रले तोकेको सीमित बजेटमा काम गर्नु पर्दा सोचे अनुसारको काम गर्न पाइएन । यही बेला प्रदेश र केन्द्रको पनि निर्वाचन भए । पहिलो वर्ष सोचे अनुसारको हामीले काम गर्न नसके तापनि राम्रो सुरुवात गरेका छौं । यसले अबको यात्रा सुखद् हुने विश्वास गरेका छौं ।
 एक वर्षको बीचमा खास केके काम गर्नु भयो ?
हाम्रो गाउँपालिका ३ नं. प्रदेशकै सबैभन्दा ठूलो भूगोल भएको गाउँपालिका हो । दोलखाको अति दुर्गम क्षेत्र पनि यसैमा छ । छरिएर रहेको बस्ती भएकाले विकासका पूर्वाधारहरु सडक, खानेपानी, सिंचाइ, विद्यालय, विद्युतीकरण पु¥याउन असाध्यै खर्चिलो छ । सडकको समस्या भएकाले हामीले सडकमै ध्यान दिएका दियौं । हरेक वडा केन्द्रबाट गाउँपालिकासम्म यातायात चल्न सक्ने बनाएका छौं । सडकको मापदण्ड बनाएर काम गरेका छौं । पछिसम्मलाई सडकलाई चाहिने जग्गा समेत अहिले नै छाडेर सडक खनेका छौं । धेरै सडकका ट्रयाक खोलेका छौ । अब ठिङ्साङ–विगू–चिलंखा–लामाबगर सडकको वडा नं. ४ र ५ को बीचमा ३ किलोमिटर र ओराङ–गोंगरखोलाको बीचमा ५ किलोमिटर ट्रयाक खोल्न बाँकी छ । यो सडक तयार भएपछि सिंगटी गोंगर पुग्ने वैकल्पिक मार्ग पनि खुल्ने छ । ओराङ–गोंगर खोला खण्डमा माथिल्लो तामाकोसी जलविद्युत आयोजनाले समेत सहकार्य गरेको छ ।
त्यस्तै गरी गाउँपालिकास्तरी अरु सडकहरुमा सोरुङखोला–ढाक्रेबोट–विगू, सोरुङखोला–बुक्माडाँडा–साङबा परेको छ । यसको चौडा पार्ने र स्तरोन्नतीको काम पनि भइरहेको छ । सोरुङखोला–ढाक्रेबोट ५ किलोमिटर खण्डमा विश्व खाद्य कार्यक्रमले काम सुरु गरेको छ ।

 सडक बनायौं त भन्नु भयो, तर वर्षात्मा त अब बन्द भएनन् ?
हामीले सिमित बजेका कारण एक वर्षमा सबै १२ महिना चल्न सक्ने बनाउँन सकेनौं । तर हिउँदमा पनि चिलंखा हुँदै आलम्पू, विगूसम्म नियमित बस चलायौं । अहिले वर्षा लागेपछि पनि सोरुङसम्म नियमित बस जान्छ । कति ठाउँमा सडक विस्तार भइरहेकाले पनि गाडी चल्न सकेको छैन ।
हामीले सडकलाई दुरुस्त राख्नका लागि उपकरणहरु पनि जोडेका छौं । सडकमा उपकरण भाडामा नै धेरै खर्च हुने महसुस गरेर निर्वाचित भएर आउँने वित्तिकै स्काभेटर, व्याकहोल, ट्रिपर खरिद ग¥यौं । यसको सुरुमा बाहिरबाट सामान्य विरोध पनि आयो तर अहिले सबैले महसुस गरेर अरु स्थानीय तहले पनि खरिद गर्न थालेका छन् । ३४०० थान जाली र हिमपाइप खरिद गर्ने प्रक्रियामा छौं । यो चाँडै हुन्छ । अब नियमित चल्ने सडकको जहाँ पहिरो जान्छ, पहिरो पन्छाउन र ग्याविन भरेर चल्ने ठाउँमा उपकरणहरु तयारी अवस्थामा राखेका छौं ।
 आगामी आर्थिक वर्षको नीति तथा कार्यक्रम पास गर्नु भयो, त्यसमा के कार्यक्रमलाई प्राथमिकता दिनु भएको छ ?
हामीले आगामी वर्षको नीति तथा कार्यक्रम पारित गरेका छौं । संभवतः सबैभन्दा पहिला बजेट पास गर्ने स्थानीय तह मध्ये हामी अगाडी नै हुनु पर्छ । यो वर्ष सडक पछि शिक्षालाई नै जोड दियौं । आगामी वर्ष शिक्षालाई पहिलो प्राथमिकतामा राखेका छौं । सडकमा बाँकी ट्रयाक खोलेर अरु स्तरोन्नती गरेर वर्षैंभरी चल्ने सक्ने बनाउने हो । कक्षा ५ सम्मका बालबालिकालाई विद्यालय पोशाक, झोला, विद्यार्थी अनुपातमा शिक्षकको दरबन्दी, शिक्षकलाई तालिम निजी स्रोतबाट तलब खाने शिक्षकहरुलाई गाउँपालिकाबाटै तलब खुवाउने कार्यक्रममा समेटिएका छन् । स्वास्थ्य सेवा सबैंको पहुँच पु¥याउने, एक घर एक धारा र शौचालयको कार्यक्रम छन् । पर्यटकीय क्षेत्रको पूर्वाधार विकास गर्ने जस्ता कार्यक्रम छन् ।
सिंगटीमा एकीकृत सेवा केन्द्र बन्दै छ । त्यो पूरा भएर संचालनमा ल्याउँछौं । ७ वटा पक्कि पुल निर्माणका लागि आवश्यक बजेट व्यवस्थापन गर्दै छौं । अहिले पनि विगूका अधिकाँश घर अध्यारोमै वस्नु पर्ने अवस्था भएकाले विद्युतीकरणमा ध्यान दिनेछौं ।

 शिक्षकलाई त केन्द्र सरकारले नै तलब भत्ता दिन्छ नि, गाउँपालिकाबाट पनि फेरि किन दोहोरो भएन र ?
हो, केन्द्र सरकारले पठाएका शिक्षकलाई तलब उतैबाट आउँछ । तर हाम्रोमा त भौगोलिक विकटताका कारण केन्द्रको सबै मापदण्ड पुग्दैन । पछि खुलेका माविहरु भएकाले दरबन्दी कम हुँदा निजी स्रोतबाट शिक्षक राखेर चलाउँनु परेको अवस्था छ । चालु आर्थिक वर्ष मात्र शिक्षकको तलबमा मात्र ३६ लाख खर्च भएको छ । आउँदो वर्ष यो खर्च बढेर ५० लाख पुग्ने अनुमान छ । हाम्रा विद्यालयको शैक्षिक गुणस्तर सुधार गरेर पढ्नकै लागि सहर बस्नेहरुलाई गाउँमै फर्काउने अभियान छ ।
 यति धेरै काम गर्न बजेटले पुगेको छ ?
हामीलाई काम गर्नका लागि अहिले समस्या नै बजेटको छ । आगामी आर्थिक वर्ष २०७५÷०७६ का लागि ३५ करोड ७१ लाख ८० हजारको बजेट पास गरेका छौं । यो बजेट भनेको वडातहबाट माग भइ आएका योजनाको ५० प्रतिशत पनि धान्दैन । तर पनि हामी जति छ त्यसैलाई व्यवस्थापन गर्ने कोसिस गर्दै छौं । हाम्रो बजेट भनेको वित्तीय समानीकरण अन्र्तगत ११ करोड २८ लाख, सशर्त अनुदान केन्द्रको १२ करोड ४५ लाख, राजश्व १ करोड, प्रदेशबाट ससर्त १ करोड २२ लाख समानीकरण ७६ लाख आन्तरिक आम्दानी २ करोड रहेको छ ।
विगू त ३ नं. प्रदेशकै ठूलो गाउँपालिका स्रोत र साधनले पनि सम्पन्न छ तर त्यस्तो अभाव के भयो ?
हो, यो गाउँपालिका प्रदेशकै सबैभन्दा ठूलो र स्रोतसाधनले पनि सम्पन्न छ । भर्खरै पूर्वाधार विकासको काम सुरु भएकाले भौगोलिक क्षेत्र अनुसार ठूलो लगानीको आवश्यक छ । स्रोत साधन जलस्रोत र जडिबुटी, वन नै हुन् । तर माथिल्लो तामाकोसी लगायतका जलविद्युत आयोजनाहरु निर्माणाधिन छन् । जडिबुटी वनको स्रोत परिचालन गर्न संरक्षण क्षेत्र भएकाले त्यसको पनि आफ्नै कानुन छन् हामीले प्रयोग गर्न सक्दैनौं । आन्तरिक स्रोत अहिले नै केही छैनन् । गाउँका जनतालाई जथाभावी करको भारी एकैचोटी करको भारी बोकाउनु पनि हुन्न विस्तारै कर तिर्ने बानीको विकास गराउने हो । हाम्रो अहिलेको भरपर्दो आन्तरिक स्रोत भनेको घरधुरी कर र मालपोत मात्रै हो ।
हाम्रो यो कार्यकाललाई अप्ठ्यारो छ । तर अबको ५ वर्षपछि यहाँको निर्माणाधिन जलविद्युत आयोजनाहरु बनेपछि हामी अरु स्थानीय तहलाई नै ऋण दिन सक्ने हैसियतमा पुग्न सक्छौं । त्यसको पूर्वाधार हामी पनि बनाउँदे छौं ।
 ४ वर्षपछिको विगू गाउँपालिका कस्तो हुन्छ ?
समृद्ध विगू गाउँपालिका बनाउन हाम्रो क्रियाशिलता हो । त्यसैमा हाम्रा जनप्रतिनिधिहरु, कर्मचारीहरु लागेका छौं । समृद्ध भन्ने वित्तिकै अबको ४ वर्षपछि हरेक घरमा स्वच्छ खानेपानीको धारा, शौचालय हुने छ । टोलटोलमा १२ महिना चल्ने सडक हुनेछ । गुणस्तरीय शिक्षाका लागि र रोजगारीका लागि कोही पनि गाउँ छाड्नु पर्दैन । सिंगटी व्यवस्थित सहर हुनेछ । नागरिकको जीवनस्तर अहिलेकोभन्दा धेरै माथि हुने छ । खेती र पशुपालनलाई व्यवसायिक बनाउँने छौं र विगूको आलुको ब्राण्ड बनाउँछौं ।

Shares

Dikshan Online TV

Be the first to comment on "“५ वर्षपछि हामी अरु सरकारलाई ऋण दिने हैसियतमा हुन्छौं”"

Leave a comment

Your email address will not be published.


*