दोलखामा बस दुर्घटना, १३ घाइते

दोलखाको भीमेश्वर नगरपालिकामा यात्रुबाहक बस दुर्घटना हुँदा दर्जन बढी घाइते भएका छन्। नगरपालिकाको वडा नम्बर २ स्थित पाख्लती बजार नजिकैको मोडमा बा ४ ख ५१४९ नम्बरको यात्रुबाहक बस दुर्घटना हुँदा १३ जना घाइते भएका हुन् । बसमा ४० यात्रु सवार थिए । काठमाण्डौबाट दोलखाको लामाबगर तर्फ जाँदै गरेको उक्त बस मोडमा स्टेरिङ काट्न नसक्दा सडकको भित्तामा ठोकी दुर्घटना भएको जिल्ला प्रहरी कार्यलय चरिकोटका प्रहरी निरीक्षक प्रदीप महतले जानकारी दिनु भयो। दुर्घटना परी घाइते हुनेहरूमा भीमेश्वर नगरपालिका -१ सुस्पाका ४१ वर्षीय केशर बहादुर थामी, ४९ वर्षीय प्रकाश सुवेदी, भीमेश्वर – ३ पुरानो बजारकी ७ वर्षीय श्रृष्टी शिवाकोटी, कालिन्चोक गाउँपालिका वडा नम्बर -९ सुन्द्रावतीका २३ वर्षीय सुदर्शन खतिवडा, ३५ वर्षीय सुन्दर प्रसाद पाण्डे, कालिन्चोक – ७ सुनखानिकी ४२ वर्षीय धनलक्ष्मी तामाङ, कालिञ्चोक- ८ सुनखानिका ३५ वर्षीय सिताराम शिवाकोटी,कालिन्चोक -३ लामिडाँडाका १८ वर्षीय दिपेन्द्र खत्री घाईते भएका छन्। त्यसैगरी विगु गाउँपालिका- ७ बिगुकी ३५ वर्षीय फुरलाङमु शेर्पा, ५९ वर्षीय पासाङ डोमा शेर्पा, बिगु -३ बुलुङका २५ वर्षीय रामचन्द्र ठकुरी, ५८ वर्षीय विष्णु बहादुर ठकुरी, बिगु-४ सिंगटीका ३८ वर्षीय तेज बहादुर ओली घाईते भएका छन्। घाइते हरुको प्राथमिक स्वस्थ केन्द्र चरिकोट र गौरिशंकर जनरल अस्पतालमा दोलखामा उपचार भइरहेको प्रहरीले जनाएको छ। घाइतेहरुको अवस्था सामान्य रहेको अस्पताल स्रोतले जानकारी दिए। चरिकोट र दोलखा चौकीबाट खटिएका प्रहरी टोलिले घाइतेहरूको उद्धार गरेका थिए।